أحداث اليوم - بعد انتشار أي خبر طلاق على السوشال ميديا سواء مشاهير أو أشخاص بحسابات خاصة بس كانوا ينشروا صورهم العائلية، من أكثر التعليقات اللي بنسمعها “السوشال ميديا خداعة” أو “لا تصدق كل ما ترى” .. دلالة على انّه رغم انه علاقتهم سيئة ولكنهم كانوا ينشروا صور غراميات وسعادة.. يعني كانوا fake وبيضحكوا على العالم.. يعني "ياما تحت السواهي دواهي"..
بس للحظة قعدت أفكر.. هل فعلا هم كانوا يمثلوا أو يكذبوا؟ شخصياً بآمن انه لأ..
العلاقات ومنها الزواج علاقة فيها تفاصيل متشعبة، ما بتبدأ ولا بتنتهي عند كلمة بحبك وبحبه.. وأكيد لا تكفي صورة واحدة لتعبر عن سعادة الزوجين أو تعاستهم..
بآمن انه فلان وفلانة، لما نشروا صورتهم سوا، كانت هديك فعلا لحظة جميلة، وممكن بعدها بعدة شهور مروا بظروف جعلتهم ينفصلوا. ظروف لا تُحتمل: الخيانة، الضرب، الإهانة، الحبس…الخ. أو عادة سيئة عند أحدهم حاولوا يغيروها لسنوات.. وخلص تعبوا.
وكذلك من قال انه الزوجين اللي بينشروا صورهم، وما تطلقوا، علاقتهم مثالية؟ مين قال انه انت القارئ سواء بتنشر صورك أو لأ، علاقتك مثالية؟ ومع ذلك بتعملي عيد ميلاد لزوجك، وانتَ بتمسك ايد زوجتك في الأماكن العامة..
وأكيد ما بتجلس بأي مكان تحكي عن تعاستك أو سلبيات زوجتك أو زوجك.. لأنه الطبيعة البشرية بتكتم هاي الأمور على أمل تتحسن، وعلى أمل تتغير.. ولأنه المشكلة اذا تدخلوا فيها كتير ناس.. عادة ما بتنحل.
الصور اللي بنشوفها لمشاهير، وبعدها بشهور بيتطلقوا.. ممكن أخدوها للصورة بلحظة تطورت فيها علاقتهم ايجابياً فعلاً، وقدروا يتجاوزوا التحديات، وبعدها رجعوا وصلوا لطريق مسدود وصار الطلاق. ما في علاقة مثالية ١٠٠٪، واحنا أنفسنا لو بدنا ننتظر لحظة مثالية ١٠٠٪ نكون فيها راضيين عن كل اشي بحياتنا وبيتنا وأولادنا وزواجنا لناخد صورة.. كان عمرنا ما أخدنا صورة. لأنه الحياة ببساطة… مش هيك! مرحلة الزواج الطازة لما يتعرفوا الزوجين عبعض أكتر، ومرحلة الأولاد واللي كمان الزوجين بيرجعوا بتعرفوا فيها على بعض لانه في كتير أمور حتختلف.. ومرحلة التربية والفروقات بين الأب والأم.. ومرحلة الفقر والغنى، ونجاح المشروع وفشله.. والغربة والهجرة.. كلها مطبات بيمر فيها أي زوجين تقريباً وبيحاولو يحلّوها.. وخلال ذلك بيتصورو، وبيسافروا، وبيحبو، وبينبسطو، وبيعملو محتوى مع بعض، وبيتغزلوا ببعض.. لأنه كيف حتتصلح الأمور بينهم اذا ما حطو كل جهدهم الإيجابي لترميم العلاقة؟ ومتلكم متلهم.. ما راح يحكو لحد كيف عم يصلحو علاقتهم وكيف عم يزبطو أمورهم..
بس الفرق انه هم بيعملو محتوى عاليوتيوب..
وانت بتطلعي مع زوجك عبيت صحابكم بتلعبو شدّة..
عالجهتين طبيعي تظهروا بشكل فيه وئام ووفاق.. وهاد مش كذب. هاي الحياة.. بتحبو بعض رغم الفروقات.. وبتحاولوا ترمموا الفجوات.. وهاد هو أساس الحب والتفاهم.. انه رغم كتير أمور.. بيسندو بعض وبيحاولو وبيكون هو عرينها وهي سماه..
طبيعي أحيانا توصلوا لطريق مسدود اسمه الطلاق. وكتير ظلم حد وقتها يوصفكم ب “الممثلين أو الكذابين”..
وكتير محزن انه نحكم على طلاق أحدهم بإنه "كانوا يمثلوا" أو نكذب صدق علاقتهم بمرحلة ما.. لأنه هاد بيعكس نقص في حياة الكاتب نفسه.. وبيحاول يراضي نفسه من خلال الحكم المجحف على علاقات الآخرين..
برأيي الشخصي: ما في حد فاهم الزواج والحب صح.. ممكن يحكم على زواج كامل ويقرر طبيعته وشكله من كلمة "طالق"!