أحداث اليوم - مجدي القبالين - خلال السنوات والعقود الجايّة، رح نشهد أكبر نقلة في تاريخ الكمبيوترات والاجهزة الالكترونية والتلفونات!
تكنولوجيا تصنيع الكمبيوتر مش بس رح تتطور… لا، رح تتغير من الأساس! كل إشي متعودين عليه من أنظمة وبرمجيات ومناهج دراسية رح ينقلب رأساً على عقب. حتى علوم الحاسوب (Computer Science) اللي منعرفها اليوم، رح تتغيّر بشكل كامل، لأن كل إشي رح يبني على تكنولوجيا الحوسبة الكمية (Quantum Computing)، يعني ثورة أكبر بكتير من الثورة اللي صارت لما اخترعوا الترانسستور (Transistor)!
رح ندخل عصر جديد اسمه عصر الكمبيوتر الكمومي (Quantum Computer Era)، وكل شي فيه مختلف:
الأمن السيبراني (Cybersecurity) رح يتغير بالكامل، من أساس التشفير (Cryptography) لطرق حماية المعلومات.
البرمجة (Programming) نفسها رح تتغير، لأنه رح نحتاج لغات جديدة تناسب الكيوبتات (Qubits) مش البتات التقليدية.
حتى تحليل البيانات (Data Analysis) والخوارزميات (Algorithms) رح تتبدل وتطلع أشكال جديدة ما عمرنا شفناها.
يعني حتى العلوم الثانية مثل الفيزياء، والرياضيات، والذكاء الاصطناعي (AI)، كلها رح تتطور بشكل مخيف مع دخول الكمبيوترات الكمومية، لأنه سرعة المعالجة رح تصير عشرات آلاف المرات أسرع من أي إشي متخيلينه اليوم!
ببساطة… خلال 20 أو 30 سنة، رح ننتقل من الكمبيوترات الكلاسيكية (Classical Computers) للكمبيوترات الكمومية (Quantum Computers)،
والعالم كله رح يصير مختلف تماماً !!