أحداث اليوم - سخر مواطن ناشط على موقع التواصل الاجتماعي فيسبوك واقترح على الحكومة نظرية اقتصادية بعنوان "جور حشيش"، تقوم على اساس سماح الحكومة للمواطنين زراعة الحشيش لموسم واحد وبذلك يتم حل المشكلة الاقتصادية التي تصيب البلاد والتخلص نهائيا من المديونية .
وقال الناشط الفيسبوكي (س.م) ان نظريته ، ستكف يد الحكومة من السطو على جيوب المواطنين ، وذلك من خلال السعر المرتفع للحشيش والمخدرات .
والنظرية كما هي :"وجهة نظر أطرحها على الحكومة في ضوء تزايد المديونية و اعلان البنك المركزي تراجع الأحتياطات من العملة الأجنبية بواقع ١٤٪
اسميت النظرية " JorHashish " جورحشيش
بما أن الشارع ساخط على الحكومة لعدم تقديم أي من الفاسدين للعدالة ، هنا أرى أن نتحول كلنا لفاسدين و بنطلع خالصين مع الحكومة . نحن عنا تقريباً ٩ مليون دونم قابله للزراعة احنا الشعب بنزرع ٩ مليون دونم اللي بنملكهم في الاردن "حشيش" لموسم زراعي واحد مدته ٣ شهور وبعديها بنتوب .
حيث ان سعر الكيلوحسب التعرفة الحكومية يصل الى ١٥٠٠ دينار و عليه الطن يعادل ١,٥٠٠,٠٠٠ دينار . و إنتاجية الدونم الواحد وفقاً لخبراء الحشيش تصل الى ٣ طن يعني الدونم بجيب ٤,٥ مليون دينار في ٩ مليون دونم يعني طال عمركم ٤٠,٥٠٠,٠٠٠,٠٠٠,٠٠٠ تريليون دينار ، وعليه :
1- بنسدد مديونية الاردن اللي هبلونا كيف بدنا نسدها ٣٧ مليار .
2- بنعيد بناء البنية التحتية بحيث توزع على جميع المحافظات توزيع عادل بحيث تكون جميع مناطق الاردن متساويه و بنسحب جزء من البحر الاحمر لحتى يصير عنا مناطق بحريه يعني مياه كل مكان و انسى قصص التصحر و قناة البحرين و ببطل عنا شمال و جنوب كله زي بعضه يعني تقريبا بتكلف العملية ١ تريليون لإعادة بناء كاملة لهيك مشروع .
3- فتح حساب بنكي لكل دفتر عائلة يكون رصيده مليون دينار بتكلفه اجماليه ٩ تريليون دينار هذا على حساب ان المواطنين الاردنين عددهم ٩ مليون شخص و لا تقلي حد عنده حجة غلاء و راتب مش مكفي و هذا بده يتزوج و هذا قرفنا بتفلت بده يهج من البلد .
4- يبقى عنا ٣٠ تريليون و شوية فراطه بنحط منهم ١٠ تريليون للبحث العلمي...اه مش احنا دوشونا الاردن يفتقر الى المواردالطبيعية ولكن يملك الموارد البشرية هاي استثمرنا في العقول المحلية .
5- إعادة توزيع الرواتب بحيث المدرس يوخذ راتب رئيس وزراء و رئيس الوزراء راتب المدرس كله زي بعضه .
6- يتبقى عنا فائض كبير، ما بعرف عن الحكومة اذا عجبتهم القصة بنشتري شوية اراضي من جنوب سوريا وبنزرع زرعه ثانيه و بنبطل نهائيا و بنتوب توبة نصوحة و بنبلش نشتري آبار نفط من الخليج للدولة و بنسكر طابق النووي اللي مش عارفين آخرته .
بهذا تكون قد حُلت المشكلة من جذورها و بنسكر طابق الفساد و المديونية و الفقر و البطالة و المياه و الطاقة و اللاجئين و بنطلع كلنا متواطئين و خالصين"