أحداث اليوم -

نشرت الإعلامية إيمان الحصرى عبر حسابها الرسمي فيس بوك صورة تجمع بينها وبين الفنان مصطفى شعبان و والدة الشهيد "هشام شتا" شهيد مذبحة كرداسة.

وكتبت الإعلامية معلقة على الصورة قائلة : "والد الشهيد كان عاوز يسعد أم الشهيد ويفرح قلبها ولو لدقائق، لانها شافت فيلم كود 36 واللي فيه شبه كبير جدا من ابنها الشهيد وبالصدفة كمان كان عامل في الفيلم دور ضابط شرطة بدأت تبكي بحرقة وتنادي عليه وتحتضن الشاشة وتقول ده هشام.

فطلب مني إني أزورها بصحبة الفنان مصطفى شعبان في البيت لأنها لو شفته هتشوف فيه ابنها، وهتبقى سعيدة ودي أمنية لها، وإنه بعت الرسالة من وراها عشان لو وافقت تبقى مفاجأة ولو رفضت متزعلش، والرسالة بتاعته انتهت على كده".

وتابعت: "وصلت لشعبان اللي كان صعب الوصول إليه عشان بيصور شغل رمضان ومن غير تفكير أو تردد الحقيقة أول ما عرف الحكاية وافق على طول على الزيارة وكان متحمس جدا وحددنا الميعاد مع والد الشهيد إننا هنروح النهاردة".

واستكملت: "الأب قرر يعملها مفاجأة للأم وفهمها إن زملاء هشام رحمة الله عليه جايين يزوروها وكانت محضرة سفرة كاملة احتفالا بيهم، الحقيقة المشهد اللي فتحت فيه الباب و لقت قدامها مصطفى شعبان و الله العظيم مش لاقيه أي كلام يوصفه، بس ممكن كل واحد يتخيل حجم المفاجأة والدهشة والدموع والوجع والفرحة والألم والأمل لأم اعتقدت ولو لدقائق أن ابنها عاد إلى حضنها".