أحداث اليوم - أوضحت الفتاة فاتن عبيدات حول حادثة اعتدائها على رجال الأمن العام داخل أحد المحلات التجارية والتي انتشرت عبر مواقع التواصل الاجتماعي.

وقالت عبيدات في بيان صدر عنها، إن الفيديو الذي الذي انتشر للحادثة غير كامل وأنه مجتزء لغايات في نفوس أصحاب الذين نشروه وأن الخلاف كان مع صاحب محل تجاري أراد استغلالها.

وأضافت أنها ترفض الإساءة لها وأن قولها "بنت العبيدات" ليس للفخر وإنما لرفضها الإساءة إليها من قبل صاحب المحل إذ قام بالاعتداء عليها وفق ادعائها.

وتاليا نص البيان:

مساء الخير لكل نشمي ونشميه لأبناء هاد الوطن الحبيب ولاجهزتنا الأمنية
انا فاتن عبيدات الي مبارح انتشر الفيديو تاعي اولا الفيديو الي انتشر ليس الفيديو الكامل الي مدته ١٨ دقيقه وهاد الفيديو تقطع وانتشر كل واحد متل ما بده وبالطريقة الي بتجيبله لايكات وكومنتات أكثر لحتى يسيئ الي انا لما قلت بنت العبيدات هاد مش لاني بدي افتخر بعيلتي انا دايما يفتخر فيهم انا بنت اصل وما برضى الإساءة لأهلي ولا اني بناشد بالفزعات بس انا انساء الي بشكل كبير وانا لما قلت معروفه مين انا انا بنت مين وشو انا انا عمري ما أسأت لحدا ولكن للأسف انساء الي بشكل كبير
والاشاعه الي انتشرت اني انا بعتدي عالاجهزه الأمنية غير صحيحه هاد الشخص صاحب المحل التجاري كان بده يستغلني وبعد ما حكيتله انت عم تستغل حاجة الناس صار يصرخ ولم علي الناس وباختصار اجو الاجهزه الأمنية وسألوني شو في ولاكني كنت بحاله نفسيه سيئه وعم ببكي وانا بالسياره انه كيف ينساء الي بهالطريقه حكيت للشرطي انه انا حاليا مش قادره احكي صار يخبط عالسياره ويتمسخر بعديها فتح باب السياره وهجم علي وضربني واخد مفتاح السياره
بتمنى من كل أردني يفهم الموضوع قبل ما يتهجم علي وقبل ما يسيء لشرفي ولسمعتي لانه كلكم عندكم خوات وأمهات وما بترضو حدا يسيء الهم ويتمنى منكم تشطبوا لانكم ما فهمتوا الموضوع بالشكل الصحيح بدون ما ترجعوا لأي مصدر رسمي وانا للاسف رح اقدم شكوى رسميه بكل شخص قام بنشر الفيديو او نشر كلام يسيء الي ولسمعتي ولشرفي وانا بكل أسف رح اضطر ارفع قضيتين على كل شخص نشر الفيديو قضية تشهير وقضية ذم وتحقير والي نشر الفيديو عدد كبير وانا ما بحب اشتكي على مواطن أردني فرجاء اشطبوا والفيديو وسكروا عالموضوع لانه هالشي سببلي ضرر نفسي كبير بتمنى من كل أردني عنده نخوه يشطب الفيديو والي ما رح بشطب واذا ضلت الإساءات موجوده انا رح اقدم شكوى رسميه
أختكم فاتن عبيدات

[31-03-2020 11:21 PM]