أحداث اليوم - بعد الهجوم العنيف الذي شنّه راغب علامة على رجال السياسة في لبنان، الذين لم ينجحوا بعد في تأليف الحكومة الأمر الذي انعكس سلباً على ترّدي الأوضاع السيئة أصلا التي يشهدها لبنان، توالت الانتقادات العنيفة من قبل النجمين اللبنانيين عاصي الحلاني وإليسا والممثل يوسف حداد على السلطة ذاتها، التي أوصلت الأمور الى ما وصلت اليه، إذ صبّ عاصي جام غضبه على هذه السلطة التي نعتها بعبارات قاسية عبر سلسلة تغريدات أطلقها على حسابه الخاص على موقع التواصل الاجتماعي»تويتر»، تناول فيها أزمة تشكيل الحكومة فكتب بغضب: «بين التعطيل والتطنيش والتأليف والتلفيف العالم رح تموت بدا رغيفففف من فرن أبو عفيف. والمشكلة ما عاد في لا كبير ولا صغير، وكيف بدّو هالبلد يقوم من البير والعتم الطويل.. لأن الكهربة يوم معنا ويومين علينا والمحارق رح تحروق ايدينا او منحروق زبالة بالشارع «.
وأضاف في هجومه على المسؤولين: «ضعتوا وضيعتّونا كنّا ناطرين الحكومة، الحكومة راحت، والحكومة رجعت، ولهلق ما في حكومة تهتّملي بهمومي، الهيئة صارت مرحومة.. وكيف بدو هالبلد يمشي إذا كل شعب هالبلد مضروب ومكرسح متل هالبلد، مش عم يقدر يوقف ويمشي.. لازم تسرعوا إذا صار في عنا حكومة وجبنا فيول، واجت الكهربة بدكن مين يقدر يوقف ويزقّفلكم ما الكل مكرسح.. حيرّتونا وجنّنتونا ولعنتو الجابونا يوم مصالحين ويوم زعلانين، انتو مين ومن وين جايين وكيف مركبيّن حتى وعتونا ونطرطونا وعالوعد يا كمون عيشتونا كل هالسنين.
ولك الله يساعدنا عليكم والله ياخد بايديكم ما انتو أصحاب البلد ولألكم عم ربي الولد حتى يعمل حارس».
وختم: « ويلعٌن أبو المدارس ويمكن بشي رصاصة بيموت إذا بيدوبل عن وزير وكان سهيان وداعس.. لازم تنحل القصة ونحنا هلق بنصّا لازم يمروق نص التاني حتى يصير عنا بلد.. أنا قلت النص التاني حتى يتأكدوا بعد مرة ما حدا بيلغي التاني، لأن الواحد صعب يصر تنين #لبنان_واحد مابيصير تنين».
النجمة إليسا أعربت بدورها عن استيائها من تردّي اأاوضاع التي وصل اليها لبنان، مبدية أسفها لأنّ هذا البلد يستحّق الأفضل كما كتبت معلّقة: «أحيانا أقرأ الأخبار، أرى مدى اليأس الذي نحن فيه في هذا البلد، وكلّ ما أريده هو العودة إلى النوم. لبنان يستحق أفضل من هذا».
وفجّر الممثل يوسف حداد غضبه في وجه أكثرية المسؤولين السياسيين الذين اعتبرهم أنهم «غارقون بالفساد والسمسرة وتفقير وتهجير الناس وانو ادارات الدولة والمراقبة والمحاسبة، تكون ناطرتني حط صورة ع صفحتي حتى يحسّو إنو في مشكلة كهربا صرلا تلاتين سنة وإنو أغلبية الناس عم بتأن من الفقر والقلّة والتفاوت الطبقي اللي وصلنالو. كلّ وسائل الإعلام اتصلت حتى إطلع إحكي بالأخبار وكلّ المواقع شاركت البوست، وكلّ الاذاعات قريت اللي كاتبو، وآلاف الأصدقاء وآلاف اللي صارو أصدقاء كتبوا وعبّروا عن حزنن وقرفهم وعتبهم وكرهن لهالطبقة الحاكمة من عشرات السنين وضرورة تغييرها بأية طريقة لأنو اكتفينا واكتوينا منكم.»
وأضاف «تحرّكت الوزارات وطلّو صوبنا تا يراقبو عداد صاحب الموتور وكأنو المشكلة معو ومن تسعيرتو وما فهمو إنو مشكلتنا معهم ومع ادارتهم وقلّة وعيهم واقطاعهم وحربهم ع المناصب وتقاسمن للسلطة. استحو بقى لا كهربا ولا مي ولا دوا ولا اشغال ولا خليوي والزبالة طامتنا وبحرنا وانهارنا ملوثين وطرقاتنا توابيت لشبابنا، ولا مدارس ولا جامعات وضرايب عشوائية بتطال الفقرا وملايين النازحين اللي بدكم توطنوهم وتقبضو عليهم، ووفواتيرنا الأغلى بالعالم ومندفعا مرتين. اللي استحو ماتو وقلة الحيا شعاركم وضرايب جديدة جايي تا توجعنا اكتر وتسد عجز سرقاتهم وفشلهم. دايما الفشة بالشعب المعتر تا يوهمونا إنن مهتمين».

[23-09-2018 06:30 PM]