دولتك مش مهم حكيت أو لا، نتعداها، المهم إنك بالمستقبل القريب تسمعنا عن أسماء محرزة "هبره"، تتحول للقضاء ومافي إلها أي غطاء، أسماء تفش الغل لانو لحد الآن ما سمعنا منك الا إبشرو، وعندي والموضوع موضوع وقت، وما عندي كبير والقانون فوق الجميع، والكل سواسية والفاسد سيحاسب.
لغاية اللحظة شغلكم عالقد، "مدير ضريبة ومدير قسم ومعاهم سايق جرافة أظن"، وكمان رجعتوا ١٥٠ مليون مش بطالات، لكن بالفساد اللي صاير بالأردن ولا إشي "صغيرة" من طرف الجيبة، نتمنى يادكتور ماتكون هاي أقصى طموحاتك، وتعتقد إنها تلبي طموحاتنا، بدنا أسماء مسبوقة بمعالي وسعادة تسد احتياجتنا وتنعش اقتصادنا بدنا نتنفس.

ونذكرك بـ"العطوة" اللي أخذتها من جماعة الرابع قربت تخلص والناس قايمة قاعدة، وأنت كنت "كفيل وفا" وجمانة قالت أصبروا وما فشلناكوا، الموضوع مش سواليف عرب لاقيني ولا تغديني، وتاخذنا بكلمتين حلوات، مربط الفرس بالاقتصاد والسياسة والمجتع والرياضة هو الأسماء، اه الأسماء هاي تحل وتربط، إذا ربطناهم وقيدناهم وقشينا منهم قروشنا إحنا بخير.

بيانك بيّن إنك فعلا عندك نية تشتغل، وعندك خطط، وعودك منطقية وعقلانية، ما عملتنا البحر مقافي، الموضوع حبة حبة جميل إحنا معك، ترى الثقة جاية جاية لو بدك تطرح برنامج عن تطوير الميرمية، ما إنت عارف، إنسى النواب، وإنهم بعد ما يناقشوا ويجتمعوا يفكروا ويقرروا إنك ثقة ولا لا، في شعب راقي مثقف، هم أهل الثقة، وهم من يمنحك إياها، سيبنا من هذولاك، خليهم يلعبوا تحت القبة وإحنا شايفين.

ترى زهقنا دولتك من اللي قبلك، خطاباتهم وسواليفهم دخلونا بالحيط، لكن للأمانة شوي مستبشرين ومتوسمين فيك خير، ولحد الآن أنت بالسليم، وما نقدر نسجل عليك نقطة مش لأنك جديد، وستبدي "الآن" الأيام ما كنا نجهله، لكن من كثر ما شفنا صرنا نشك بحالنا فأنت هسه، قيد المراقبة ومتهم حتى تثبت براءتك وكمان براعتك بايجاد حلول.

حكومة وشكّلت، وعطوة وأخذت، فـ يا دولتك إشتغل بضمير ونظف هالفساد، ورجع الحقوق وبري حالك بلاش تكون مُطالب وشريك و أنجلّيك عن الرابع.

[12-07-2018 07:39 AM]